0
Shares
काठमाडौं असाेज ३१ गते । बडादसैँको सातौँ दिन आज देशभरका हिन्दू धर्मावलम्बीले परम्पराअनुसार घरघरमा फूलपाती भित्र्याउँदै छन्। आश्विन शुक्ल सप्तमीका दिन शास्त्रीय विधिअनुसार नवपत्रिका भित्र्याएर पूजा गर्ने परम्परा छ। यसैलाई फूलपाती भित्र्याउने भनिन्छ।
घटस्थापनाका दिनदेखि वैदिक विधिअनुसार दुर्गा भवानीको आह्वान गरी पूजा गरिँदै आएका दसैँघर तथा पूजाकोठामा आज शुभ साइतको प्रतीकका रूपमा उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र मानवृक्ष भित्र्याउने गरिन्छ।
नवपत्रिकाका नामले समेत चिनिने फूलपातीलाई नौवटी देवीको प्रतीकका रूपमा ग्रहण गरी शास्त्रीय विधिअनुसार शक्तिस्वरूपा दुर्गा भवानीको आराधना गर्ने धार्मिक मान्यता छ। फूलपाती भित्र्याएपछि दसैँको धार्मिक र सांस्कृतिक महत्त्व अझ बढ्ने विश्वास गरिन्छ।
फूलपातीका दिन गोरखाबाट काठमाडौंको हनुमानढोका दरबारस्थित दसैँघरमा फूलपाती ल्याउने ऐतिहासिक परम्परा रहिआएको छ।
परम्पराअनुसार गोरखाबाट धादिङको जीवनपुरसम्म दसैँघरका पुजारीसहित मगर समुदायका छ जनाले फूलपाती ल्याउने गर्छन्। त्यसपछि काठमाडौंको जमलसम्म काठमाडौं उपत्यकाबाट गएका ब्राह्मण समुदायका छ जनाले फूलपाती ल्याउने प्रचलन छ। जमलबाट बाजागाजासहित फूलपातीलाई वसन्तपुरस्थित हनुमानढोका दरबारमा पुर्याउने परम्परा छ।
फूलपातीसँगै दसैँको मुख्य उत्सवको रौनक थप बढेको छ। सरकारी कार्यालयसँगै विभिन्न निजी क्षेत्रमा पनि बिदा सुरु हुने भएकाले दसैँको टीका थाप्न आफ्नो जन्मथलो र गृहजिल्ला फर्किने क्रम तीव्र बनेको छ।
काठमाडौं उपत्यकामा बसोबास तथा रोजगारीका सिलसिलामा रहेका नागरिक परिवारसँग दसैँ मनाउन गाउँ फर्किरहेका छन्। बजारमा चहलपहल बढेको छ भने सार्वजनिक यातायातका साधनमा पनि यात्रुको चाप देखिएको छ।
परिवार तथा आफन्तसँग भेटघाट गर्ने, मान्यजनबाट टीका र जमरा ग्रहण गर्ने तथा आपसी सद्भाव साटासाट गर्ने पर्वका रूपमा दसैँलाई लिइन्छ। फूलपातीसँगै दसैँको उल्लास देशभर थप फैलिएको छ।
