0
Shares
काठमाडौं, वैशाख । सल्यानको बनगाड कुपिण्डे नगरपालिकास्थित पुथालामा जन्ती बोकेको जिप दुर्घटना हुँदा ४ जनाको मृत्यु भएको छ भने १४ जना घाइते भएका छन्। घाइतेमध्ये ३० वर्षीय मनबहादुर थापाको उपचारका क्रममा मेहेलकुनामा मृत्यु भएपछि मृतक संख्या ४ पुगेको हो।
जिल्ला प्रहरी कार्यालय सल्यानका अनुसार मृत्यु हुने सबै बनगाड कुपिण्डे नगरपालिका–८ का स्थानीय हुन्।
शनिबार साँझ कालीमाटीको लक्ष्मीपुरतर्फ जन्ती बोकेर जाँदै गरेको लु.प्र.०१००१ ज ०२७१ नम्बरको जिप दुर्घटनामा परेको थियो। जिपमा १८ जना सवार थिए।
घाइतेहरूलाई उद्धार गरी सुर्खेतस्थित मेहेलकुना अस्पतालमा प्रारम्भिक उपचारपछि विभिन्न अस्पतालमा रिफर गरिएको छ। केही घाइतेको नर्सिङ होम र न्युरो अस्पतालमा उपचार भइरहेको छ भने अन्यलाई थप उपचारका लागि बाँके पठाइएको प्रहरीले जनाएको छ।
दुर्घटनाको कारणबारे अनुसन्धान भइरहेको जिल्ला प्रहरी कार्यालय सल्यानले जनाएको छ।
