0
Shares
काठमाडौं, असोज २ । नेकपा (एमाले) का सचिव योगेश भट्टराईले पार्टीभित्र नेतृत्व हस्तान्तरण, संगठनात्मक पुनर्संरचना र कार्यशैलीमा सुधार आवश्यक भइसकेको बताएका छन्। उनले नयाँ पुस्तालाई नेतृत्वमा अवसर नदिएसम्म पार्टीले अपेक्षित ऊर्जा प्राप्त गर्न नसक्ने धारणा व्यक्त गरे।
शुक्रबार काठमाडौंमा आयोजित एक कार्यक्रममा बोल्दै भट्टराईले पार्टी पुनर्गठन तथा निर्वाचन समीक्षा प्रतिवेदन तयार गर्न गठित कार्यदलको काम प्रक्रियामै अवरोध आएको दाबी गरे। कार्यदलको सहमतिअनुसार महासचिव शंकर पोखरेलले तयार पारेको प्रतिवेदनको मस्यौदा सदस्यहरूलाई अध्ययनका लागि वितरण गरिए पनि त्यसपछि छलफल अघि बढ्न नसकेको उनले बताए।
भट्टराईका अनुसार अध्यक्ष केपी शर्मा ओलीको असहमतिपछि प्रतिवेदनमाथिको प्रक्रिया रोकिएको हो। उनले अध्यक्षकै निर्देशनमा उपाध्यक्ष **रामबहादुर थापा ‘बादल’**लाई वैकल्पिक प्रतिवेदन तयार गर्न लगाइएको आरोप पनि लगाए।
उनले पार्टीका विभिन्न तहबाट आएका सुझावमा संगठन पुनर्गठन, नेतृत्व परिवर्तन तथा नीति र कार्यशैलीमा सुधारको आवश्यकता प्रमुख रूपमा उठेको उल्लेख गरे। अबको परिस्थितिमा पुरानै संरचना र अभ्यासबाट अघि बढ्न नसकिने भन्दै उनले संगठन, नीति, सार्वजनिक अभिव्यक्ति र नेतृत्व विकासमा व्यापक समीक्षा आवश्यक रहेको बताए।
भट्टराईले वर्तमान सरकारको कार्यसम्पादनप्रति पनि असन्तुष्टि व्यक्त गरे। सरकार गठन भएको करिब छ महिना पुग्न लाग्दा पनि नागरिकले अपेक्षा गरेअनुसार सेवा प्रवाह र सुशासन अनुभूति गर्न नसकेको उनको भनाइ थियो। उनले जनतामा सुरक्षा र विश्वासको वातावरण बलियो बनाउन सरकार थप जिम्मेवार हुनुपर्ने धारणा राखे।
